76-anyos gisungag sa taxi namatay

Cebu - Patay ang usa ka lolo human mabanggai og taxi atol sa iyang paglabang sa dalan MJ Cuenco sa barangay Carreta alas 4:30 sa buntag kagahapon.

Wala na makaabot nga buhi sa Cebu City Medical Center si Carlos Bolabola Sr., 76, lumolupyo sa maong dapit human dasmagi sa taxi driver nga si Inocinte Cañete Empic, 38, lumolupyo sa dalan Salvador Extension barangay Labangon.

Matud pa ni SPO2 Nelson Jayme, imbestigador sa Traffic Group sa Cebu City Police Office gikan nag-pick up og pasahero si Empic ug nisubay na sa maong dalan dihang wala niini mabantayi ang biktima nga milabang.

Sumala pa sa pangangkon sa drayber kalit ang paglabang sa tiguwang hinungdan nga wala na siya makahunong ug naigo gyud kini.

Ang ulo sa biktima gikatahong naparok sa sementadong dalan human kini natumba ug gidali og tabang ni Empic sakay sa iyang taxi ug gidala sa CCMC apan gideklarar kining dead on arrival.

Si Empic kasamtangang gitanggong sa ilang buhatan samtang gipaabot ang pagpasaka og kaso sa kabanay sa biktima.  - Lesley Caminade (BANAT NEWS)