Sikyu aksidenteng napusilan sa kauban

CEBU - Patay ang drayber sa armored van sa Metrobank human aksidenteng napusilan sa iyang kauban pasado alas-9 sa buntag sa parking area sa Metrobank Plaza sa Osmeña Blvd. ning dakbayan.

Si Raymund Mondero, 38, sa barangay Quiot-Pardo napusilan sa iyang suod nga higalang si Jershom Bomcalom, 28, nga taga barangay Sawang Calero.

Matud pa ni Bomcalom nga nahinabi sa Banat News nga iyang gisugo si Mondero nga pailisan ang bala sa iyang .38 rebolber tungod kay adunay nasagol nga laing bala.

Apan sa dihang gitunol na ni Bomcalom ang armas ngadto kang Mondero kalit kining mibuto ug naigo ang dughan niini.

Matud pang Bomcalom nga nag-atubang kang Mondero ang sumbuhan sa armas dihang iya kining gitunol, apan sa pagdawat ni Mondero ug migunit sa sumbuhan may usa sa ilang mga kauban ang mipasidaan kanilang mag-amping.

Hinungdan nga milingi si Mondero sa mipasidaang kauban dayong tubag og “ayaw binuang diha” dungan sa pagbunlot sa armas, wala niini tan-awang naa sa gatilyo ang tudlo ni Bomcalom hinungdan nga sa paghulbot niini mibuto kini.

Ang sumbuhan anha natumong sa walang bahin sa dughan ni Mondero hinungdan sa pagkaigo niini, sumala pang Bomcalom nga nakadungog pa siya kang Mondero nga miingon og “wana bay, patay na gyud ko ani” nga iyaha usab gitubag og “ayaw pagbinuang diha bay.”

Diha-diha natumba ang biktima ug misugwak ang dugo sa dughan hinungdan nga gidali nila kini og pasakay sa armored van ug gidala sa Cebu City Medical Center apan gideklarar kini sa mga doktor nga dead on arrival.

Ang suspek ug ang biktima dugay nang nagserbisyo sa maong bangko isip armored van security ug drayber sulod sa kapin lima na ka tuig.

Ang suspetsado boluntaryong mitahan sa iyang kaugalingon ngadto sa kapolisan ug gikatakdang pasakaan og kasong reckless imprudence resulting to homicide. (Lesley Caminade)   (BANAT NEWS)