Mitigbas sa mga igsuon gitabanga'g sikop sa biktima

CEBU - Usa ka 27-anyos nga lalaking giingong hubog ug miunay pagtigbas sa iyang mga igsuon nadakpan ug nagtingkagol sa Talisay City detention cell human kini sikopa sa mga biktima kagahapon sa kaadlawon sa sitio San Rafael, barangay Tanke.

Ang suspetsado giila sa mga polis nga si Ferdinand Abondiente, residente sa nahisgutang lugar human niini giunay sa pagtigbas ang mga igsoong sila si Antonio, 23, Arlene, 33 ug Hermano, 36, pulos mga residente sa maong lugar.

Si Ferdinand ang nasakmitan og usa ka sundang nga dunay gitas-on nga 15 pulgadas.

Base sa imbestigasyon sa kapolisan nga si Ferdinand nahubog kagahapon sa kaadlawon ug nanghasi dayon nanigbas sa iyang mga igsuon.

Ang mga biktima ang nakaangkon og gagmay’ng samad tinigbasan sa ilang kalawasan apan wala mahadlok maong ilang gitabangan paglayog ang suspetsado hinungdan nga nasikop kini ug nailogan sa iyang sundang.

Sila si SPO1 Ricardo Balbutin ug SPO1 Arturo Andales ang daling mitubag sa maong alarma ug gitugyanan sa mga biktima sa suspek.    (BANAT NEWS)