Kawatan og motor tiklo

Cebu - Usa ka kawatan kinsa misakay og motorsiklo aron pag-ikyas gikan sa mananakop, nadakpan gyud dihang nadasmag sa poste ang iyang motorsiklo didto sa Lower Maghaway,Talisay City niadtong Sabado sa kaadlawon.

Ang nasikop sa tanod, usa ka menor de edad kansang ngalan gipugngan sa kapolisan kay giingong nangawat kini og mga tools ug migamit pa kini og motorsiklo nga iyang gihimong get-away vehicle.

Samtang ang mga biktima mao sila si Honorato Sinina, kinsa maoy tag-iya sa mga tools ug Maximo Carin nga maoy tag-iya sa motorsiklo kinsa pulos taga Lower Maghaway.

Si Godelio Pablo, barangay tanod sa Maghaway kinsa maoy nakasikop sa nahisgutang batan-on mibutyag ngadto sa mga polis nga nabawi niya gikan sa posisyon sa menor ang usa ka tool box nga dunay sulod nga mga tools nga nagkantidad og P1,000, usa ka hydraulic jack, P700, flash light, P60 ug usa ka company ball cap, P100.

Ang suspetsado daling miikyas sakay sa motorsiklo ni Carin nga Honda Dream C-100 apan nabangga kini sa poste hinungdan nga nadakpan kini sa tanod. - Brenda D. Batuto ug Loraine Ebisa (BANAT NEWS)