Mipusil sa 3 nga nagmotor sikop

Cebu - Nasikop na sa kapolisan kagahapon sa buntag ang mipusil patay sa usa sa tulo ka nagsakay og habal-habal didto sa sitio Mahayahay barangay Liboron dakbayan sa Carcar niadtong Domingo sa gabii.

Ang mamumuno mao si Jessie Limasac, 29, nga taga sitio Oliveros, barangay Kan-asuhan sa maong dakbayan, maoy gitumbok nga mipusil patay sa dalagitang 14 anyos nga si Jessebel Tangaan.

Samtang si Rommel Tangaan, 17, ug ang drayber sa habal-habal nga si Haidee Villaquina, 18, nga kauban ni Jessebel sa maong biyahe igo lang naangol.

Si Jessebel naigo sa buko-buko sa usa ka bala nga milapos sa iyang dughan nga maoy hinungdan sa hinanali niyang kamatayon.

Samtang si Villaquina igo lang natapsingan sa usa ka bala sa buko-buko, ug si Rommel igo lang napaso sa mga pulbora sa bala nga mibadyong sa iyang lawas dihang gipamusil sila ni Limasac.

Nasayran nga ang mga biktima gikan nga namiyesta sa kasikbit nga barangay dihang pagpauli nila giatangan sila ni Limasac ug gipauwanan sa mga bala sa iyang armas de fuego sa walay igong hinungdan.

Si Limasac kinsa miangkon sa krimen nga iyang nahimo nagtingkagol na karon sa bugnaw nga prisohan sa Carcar. - BANAT NEWS