Nakigdulog gitigbas

Cebu - Gitigbas sa bana ang usa ka drayber sa traysikol nga iyang gipasanginlang kabit sa iyang asawa human kini hiabti nga midulog sa iyang asawa didto sa ilang balay sa barangay Nueva Caceres, lungsod sa Oslob, Cebu niadtong Domingo sa alas 11 sa gabii.

Ang biktima giila sa kapolisan nga mao si Francisco Taborada Jr. 35, minyo,   nga taga Poblacion, Oslob, samtang ang gitumbok nga suspek nailhan nga si Carlito Pensan, 38, minyo nga taga Nueva Caceres .

Si PO1 John Tapales sa Oslob Police Station mitug-an nga si Pensan mao pay pag-uli sa ilang balay niadtong higayona dihang sa pag-abli niya sa pultahan sa ilang balay maoy misugat sa iyang panan-aw ang iyang asawa nga si Evit (tinuod nga ngalan gipugngan) nga natulog uban ni Taborada.

Ang suspek mikuha og 13 pulgadas nga sundang ug dayon gihabas ug giligid og tigbas ang biktima sa makadaghang higayon.

Apan nakadagan pa gyud sa gawas sa balay ang biktima ug samtang nagdagan nagtabisay ang daghang dugo sa iyang lawas ug nangayo og panabang sa mga silingan.

Ang mga silingan kinsa nagtan-aw sa daghang samad tinigbasan sa nagkadaiyang bahin sa lawas sa biktima mao na lay midala ni Taborada ngadto sa Oslob District Hospital apan gibalhin kini sa Vicente Sotto Memorial Medical Center aron sa pagsalbar sa iyang kinabuhi.

Ang kapolisan sa Oslob nakapunit sa crime scene sa nabali nga sundang nga gituohang maoy gigamit sa suspek pagtigbas sa biktima apan pakyas ang kapolisan pagsikop ni Pensan.

Hangtod karon padayon pa nga gi -follow-up sa kapolisan ang maong kaso ug sa pagsikop sa maong suspek. – BANAT NEWS