Tribu Akrho wa pa dawata

Cebu - Wala pa dawata sa Sinulog Foundation ang contingent sa Akrho Fraternity nga mosalmot sa Sinulog 2009 karong umaabot Enero 18.

Kini bisan pa man kun nagbansay-bansay na ug determinado nga moapil ang nahisgutang fraternity sa Free Interpretation Category.

Matud sa executive director sa Sinulog nga si Ricky Ballesteros nga ila pang tan-awon ang performance sa Tribu Akrho kung kini makapasar ba sa ilang standards.

Partikular na niini ang costume ingon man ang sayaw kun duna bay Sinulog beat lakip na ang gidaghanon sa contingent.

Buot lang masiguro ni Ballesteros nga seryoso ang nahisgutang fraternity pagsalmot sa streetdancing competition sama sa ubang contingents.

“Before namo dawaton ang ilang contingent among siguruhon nga nakatuman sila sa guidelines, so, among tan-awon ang ilang pag-practice,” sumala ni Ballesteros.

Miingon ang executive director sa Sinulog nga posibleng sa sunod semana nila tambungan ang ensayo sa Akrho contingent.

“Kun masuta nato nga nasubay sa atong standards ang ilang gihulma nga contingent, wala man tay balibaran,” dugang pamahayag ni Ballesteros.

Una nang gipasalig sa presidente sa grupo, Richard Buscayno nga ilang gisunod ang patakaran sa Sinulog Foundation.

Moabot sa 80 ka mga sakop sa Akrho ang giingon ni Buscayno nga subsob nang nipahigayon og pagbansay-bansay sa ilang mga dance steps.

Bisan kun miisa ang kilay sa ubang Sugbuanon niining plano sa nahisgutang fraternity pagsalmot sa streetdancing, apan walay nakitang problema niini ang mga opisyal sa siyudad.

Gisalig na ni acting Mayor Michael Rama ngadto sa kapolisan ang paghatag og igong seguridad dili lang sa Akrho, kun dili sa kinatibuk-ang pagpahigayon sa Sinulog 2009. – BANAT NEWS