Job order gitaktak ni Soc

CEBU - Gipalagpot gikan sa iyang trabaho ni Mayor Socrates Fernandez sa dakbayan sa Talisay ang usa ka job order nga ubos sa iyang quota human kini pasanginli nga mipaburot sa presyo sa hydraulic oil.

Kahinumduman nga miulbo ang kontrobersiya kabahin sa pagpaburot sa presyo sa mga ekipo ug mga gamit diha sa city hall sa siyudad ug usa sa gipasanginlang nalambigit niini mao si Alvin Ybañez nga kanhi nadestino   sa General Services Office (GSO) apan gibalhin diha sa buhatan sa Philippine Mediator Center (PMC).

Si Talisay city administrator Richel Bacaltos mibutyag ngadto sa mga tigbalita nga ang investigation team miluwat na og rekomendasyon sa pagtaktak kang Ybañez gikan sa iyang trabaho nga epektibo niadtong Disyembre 22, 2008.

Si Bacaltos nagkanayon nga sa gipahigayong usa ka adlaw nga imbestigasyon nga gitambongan nila ni Emey Cabrera, hepe sa Human Resource Office (HRO) ug Joan Vebar, hepe sa GSO nasuta nga si Ybañez maoy migama sa purchase request sa hydraulic oil.

Gibutyag ni Bacaltos nga gibutang sa maong purchase request nga dunay petsang Agosto 19, 2008 ang usa ka balde nga hydraulic ATF nga dunay presyong P20,093 samtang ang hydraulic oil 10 gipresyohan og P12,245 ang usa ka balde.

Apan gibutyag ni Abarquez sa iyang gipahigayong privilege speech niadtong Disyembre 9, 2008 nga sa iyang pakisusi P2,352 ang kada balde sa hydraulic oil samtang ang hydraulic ATF P2,755 lang ang kada balde.

Ang maong purchase request gipirmahan sa hepe sa motorpool nga si Themistocles Fernandez, igsuon ni Mayor Fernandez.

Apan matud ni Bacaltos nga nalipat si Fernandez hinungdan nga wala kini apila paghatag og silot sa investigating team.  (BANAT NEWS)