Collector padung sa Christmas party namatay

CEBU – Patay ang usa ka collector nga paingon untang mutambong og Christmas party human kini makigdinasmagay sa gikasugat nga bus pasaheroan sa barangay Bato siyudad sa Toledo niadtong Sabado sa alas 8:45 sa gabii.

Ang biktima mao si Gerson Veloso, taga siyudad sa Carcar ug collector sa Norkis Company nga nadestino sa maong lugar.

Samtang ang drayber sa Isuzu passenger bus nga Bhukyol Transit nga gipanag-iya ni Roger del Rosario mao si Hepolito Mantalaba, 33, molupyo sa Calape lungsod sa Aloguinsan.

Matud ni PO3 Cris Gako, traffic investigator sa Toledo City Police dihang nahinabi sa Banat News paingon nga mutambong sa party sa ilang kompaniya ang biktima samtang ang bus gikan sa siyudad sa Sugbu nga puno sa mga pasahero paingon sa lungsod sa Pinamungajan.

Pag-abot nila sa maong lugar nagkasugat ang duha ka sakyanan ug misampak ang motorsiklo ni Veloso sa maong bus hinungdan sa pagkalabay niini ug nabunal ang lawas ug ulo sa sementadong dalan.

Gisuwayan unta pagtabang ang biktima ug gidala sa Toledo City District Hospital apan gideklarar kini sa mga doctor nga dead on arrival (DOA) tungod sa kadaut sa ulo niini.

Samtang ang drayber sa bus pasaheroan nipasirit palayo apan pag-abot sa lungsod sa Pinamungajan boluntaryo kining mitahan sa iyang kaugalingon. – BANAT NEWS