Gi-away sa misis nagpusil sa ulo

Cebu - Nabangag ang isig ka tampihak sa usa ka mag-uuma human milapos ang bala gikan sa .38 kalibreng rebolber nga giingong maoy iyang gigamit sa paghikog gumikan sa pagbiya sa iyang asawa niadtong Domingo sa alas 3 pasado sa hapon diha sa barangay Upper Natimao-an lungsod sa Carmen.

Ang nagpakamatay giila sa kapulisan nga si Francisco Aresco, 55, mag-uuma ug nagpuyo sa nahisgutang lugar wala maka-agwanta sa kamingaw sa iyang asawang mibiya kaniya ug miadto sa Negros.

Si PO3 Agustin Bejoc sa Carmen Police Station nga gikahinabi sa Banat News nagkanayon nga si Aresco ug ang wala panganling asawa niini nagkalalis niadto pang mga nilabay’ng semana gumikan sa mga personal nga problema.

Gikatahong human sa ilang panaglalis ang nagpakamatay nilayas apan nibalik niadto nang Domingo.

Apan dihang wala na niya maabti ang asawa gikatahong nagpusil kini sa iyang kaugalingon gamit ang paltik nga .38 revolver.

Nasayran nga niadtong hinapos bulan sa Nobiyembre gikatahong misuway usab og hikog ang asawa ni Aresco pinaagi sa pag-inom og hilo apan naabtan kini sa mga kabanay ug gidali og dala sa tambalanan.

Ang maong insidente matud pang Bejoc wala ma-report diha sa ilang buhatan apan nakumpirmar nila kining na-confine gyud ang babaye sa usa sa mga tambalanan.

Dihang nakagawas na ang asawa gikan sa hospital gikatahong nahitabo na usab ang panaglalis sa managtiayon hinungdan sa kahiubos sa lalaki ug milayas.

Duna usay report nga ang asawa niini nanawag sa telepono ngadto sa iyang mga anak sayo sa buntag niadtong adlaw’ng Domingo apan matud pa wala gyud maghisgot sa iyang bana hinungdan nga nisamot sa kaguol ang lalaki.

Giingong ang asawa niini miadto sa Negros aron manarbaho isip katabang.

Matud pa sa mga kabanay ngadto sa mga polis nga naguol og maayo si Aresco ug misulod kini sa ilang lawak pasado alas 3 na sa hapon ug diha nalang nila nadungog ang buto sa armas.

“Selos raman gud na sa mga tiguwang. Mga edaran na gud na sila pulos tag 50-anyos kapin, selos raman gyuy gilalisan nila pero way mga tawo nga matumbok nga love triangle…kini tungod kay mga tiguwang na daling nangluod sa usag usa,” sumala pa ni PO3 Bejoc.

Usa ka kalibre .38 nga paltik nga rebolber nga may tulo ka buhing bala ug duha ka basiyo sa tambor niini ang narekober gikan sa kamot ni Aresco.

Hinuon ang kapulisan nisugyot sa pamilya sa nagpakamatay nga ipaubos kini sa autopsy aron usab pagsiguro nga way foul play sa kamatayon niini. – BANAT NEWS