Si Kongresista Nerissa Soon Ruiz walay supak sa pagparehistro sa iyang bana nga si DILG Undersecretary Lito Ruiz ngadto sa dakbayan sa Lapulapu isip bag-ong botante sa umaabot nga piniliay.
Matud pa ni Soon-Ruiz nga gidesisyonan na sa ilang pamilya ang mga lakang nga gihimo sa iyang bana nga undersecretary sa wala pa kini nagpabalhin sa iyang pagparehistro ngadto sa Comelec Lapulapu isip bag-ong botante sa barangay Basak sa maong dakbayan.
Wala pa usab makahisgot kaniya si Usec. Ruiz nga modagan pagka-mayor sa dakbayan sa Lapulapu, apan kun kini iyang himoon dili kini niya pugngan gumikan kay iya usab kini nga katungod, matud pa ni Soon-Ruiz.
Ang gihimo ni Usec. Ruiz mao lamang ang pagpangandam sa posibleng mga tawo nga motuboy ug moawhag kaniya nga modagan pagka-mayor sa dakbayan sa Lapulapu ug isip usa sa mga rekisitos sa Comelec diin ang unom ka bulan pataas nga pagpuyo isip residente sa dakbayan sa Lapulapu maoy kinahanglan sa usa ka botante o kandidato nga makasalmot sa piniliay.
Wala usab mabalaka si Ruiz nga makuwestiyon ang iyang plano sa pagdagan isip mayor sa dakbayan sa Mandaue ug sa iyang bana sa dakbayan sa Lapulapu gumikan kay daghan na nga mga dapit dinhi sa nasud nga ang usa ka magtiayon pareho nga midagan sa usa ka posisyon sa managlahing lokal nga kagamhanan.
Dili usab kabalibaran ni Soon-Ruiz ang mga kabanay’ng Garcia maoy mosuporta sa iyang bana sa tinguhang pagpapili sa usa ka posisyon sa dakbayan sa Lapulapu.