Mga tanod giligid og bato

CEBU - Nabulit sa bun-og ang kalawasan sa mga barangay tanod sa Lawaan I, dakbayan sa Talisay dihang giligid kini og bato sa mga batan-on sa maong lugar samtang nag-roving sila didto sa maong barangay niadtong Domingo sa kaadlawon.

Ang mga barangay tanod nga sila si Marlon Hermani ug Jerry Soterol nagtibi nga miasoy sa taga media ug gipakita ang mga bun-og sa ilang kalawasan dihang nasabak kini sa mga bato gikan sa mga menor de edad nga miamong-among kanila.

Hinuon ang mga suspetsado kansang ngalan gipugngan kay nagpangidaron pa og 14 ug 17 anyos ,wala makaeskapo kay nasikop ra kini sa mga biktima human sa ginukdanay ug gihatod dayon kini ngadto sa buhatan sa Department of Social Welfare and Development sa maong dakbayan.

Nasayran nga paingon na sa pag-roving ang mga tanod didto sa SRP dapit sa Lawaan I dihang naglagubo ang ilang kalawasan nga nasabak sa mga bato nga gipalupad ngadto kanila sa mga suspek.

Ang kagamhanan sa dakbayan sa Talisay padayon sa higpit nga pagpatuman sa balaod bahin sa curfew batok sa mga batan-ong maglaroylaroy bisan lapas na sa tungang gabii.

Gisugdan ang pagpatuman sa maong balaod niadto pang Nobyembre 15 ning tuiga. – BANAT NEWS