Menor de edad gipusil

CEBU - Gipangita pa hangtod karon sa kapolisan sa dakbayan sa Talisay ang usa ka suspetsado nga mipusil sa usa ka 17 anyos nga lalake didto sa barangay San Roque sa maong syudad niadtong miaging gabii.

Si PO2 Harrison Quinanola sa Talisay City Police Station mibutyag sa Banat News nga ang biktimang menor de edad naglakaw sa karsada paingon sa balay sa iyang higala dihang kalit lamang kining giluthang ni Gerald Tadio, hingkod, nga taga barangay Cansojong sa maong gihapong dakbayan.

Matud ni Quinanola nga nasabak ang biktima sa tuong kamot, tiyan ug buko-buko ug dali kining gihatod ngadto sa Vicente Sotto Memorial Medical Center sa dakbayan sa Sugbo.

Gilusad dayon sa kapolisan ang manhunt operation batok sa suspetsado human kini mosibat , apan wala na gyud kini igkita.

Samtang usa ka tawong hubog nahuwasan sa kalasbag dihang gitaupan kini sa ice pick nga gidunggab kaniya sa iyang silingan niadtong Huwebes gihapon sa gabii didto sa Cansojong, Talisay City.

Giila sa kapolisan ang biktima nga si Gregorio Bacalso, hingkod nga taga barangay Kimba-Cansojong, Talisay City, samtang ang midunggab kaniya mao si Christopher Paril, 27, silingan ra sa biktima.

Matud pa sa kapolisan nga naglakaw ang biktima sa karsada nga nag-inusara pauli sa ilaha gikan sa inom dihang kalit lamang siyang giluba sa suspetsado.

Nasabak ang tiyan ug bukobuko sa biktima sa ice pick ug gihatod dayon kini ngadto sa Vicente Sotto Medical Center sa Cebu City.

Samtang misibat usab dayon ang suspetsado nga maoy kasamtangang gipangita sa kapolisan sa Talisay City. - BANAT NEWS