17 mil dolyares lang ang nauli

CEBU - Giuli na sa maguwang sa basurerong nakapunit sa $60,000 nga aksidenteng nalabay sa basurahan ug nakuykuyan diha sa Inayawan dumpsite.

Apan $17,000 nalang ang giuli ni Julie Compisto,26 anyos, nga residente sa maong barangay, kini maoy gikatahong kabahin sa aksidenteng nalabay sa katabang sa usa ka negosyanteng si Emiliano Tanpin,Jr. nga taga barangay Calamba.

Matud pang Compisto diha sa buhatan sa National Bureau of Investigation wala gyud sa iyang huna-huna nga taguon o angkunon ang maong salapi human niya masayring nangita ang tag-iya niini, kini bisan wala maapil ang iyang pangalan sa mga tawong gidudahang nakahipos niini.

Ang kahadlok nga basin siya mabilanggo tungod sa paghipos sa kwartang nakuykuyan sa iyang igsuon maoy nakaingon nga nadugay siya sa pag-uli niini ngadto sa awtoridad.

Ang $17,000 kabahin ra sa gihatag sa iyang manghod nga si Napoleon Ursabia human kini makuykuyi sa naulahi diha sa basurahan samtang ang uban gikuha sa ilang iyaan nga si Victoria Candido.

Ang $17,000 gitunol ni Compisto ngadto sa abogadong si Bernard Dela Cruz sa NBI kagahapon, wala hinuon masayod si Compisto kun pila maoy gikuha sa iyang iyaan apan ang naulahi gikatahong mitug-an kaniya nga $6,000 kini.

Sa sayo pa si Candido usa sa mga gihinganlan ni Emiliano Tanpin,Jr. nga maoy nakahipos sa maong mga kwarta apan ang maong ginang mihimakak dayon niini.

Dihang iyang nadawat ang maong kwarta wala dayon siya mutuong genuine kini apan human mapailisi ang usa diha na siya midesider pagtago sa usa sa mga bukid sa Barangay Bulacao apan nausab ang iyang huna-huna ug milugsong siya kagahapon sa buntag aron iuli ang maong salapi.

Si Compisto gikuyogan sa iyang bayaw nga si Renante Abasolo ug uyoan nga si Rudy Jaca ngadto sa NBI pag-uli sa kwarta.

“Wa gyud koy huna-huna nga angkunon ang kwarta bahala na og pobre ko ug way grado,” sumala pang Compisto.

Wala usab masayod si Compisto hain na ang iyang igsuon nga si Napoleon apan dako ang iyang pagtuong naa kaniya ang ubang bahin sa maong mga dolyares, wala usab siya masayod sa report nga gi-turnover ang maong salapi ngadto kang Inayawan Barangay Captain Rustom Ignacio.

Si Ignacio, Warlito Ignacio, Victoria Candido,Goliat Ursabia ug Napoleon gireklamo og pagpangawat ni Tanpin diha sa NBI tungod sa giingong pagdumili nila pag-uli sa iyang kwarta.

Ang kapitan daan nang mihimakak nga may kwartang gi-turn-over kaniya ang mga basurero.

Ang maong salapi aksidenteng nalabay sa katabang ni Tanpin niadtong Nobiyembre 26 sa buntag human niya kini nabiyaan sulod sa sako sa bugas ibabaw sa lamisa tungod sa pagtuong mga basura kini. - Uban sa report ni Fred Languido sa The Freeman (BANAT NEWS)