Armado Dakpan sa C'point

CEBU - Mga biktima sa tulis sa dakbayan sa Talisay giawhag sa kapolisan sa siyudad nga moanha sa ilang buhatan aron ilhon ang duha ka lalaking ilang nasikop atol sa gipahigayong checkpoint niadtong Huwebes sa gabii diha sa Upper Mohon ug Lawaan II.

Si PO2 Leandro Azarcon sa pakighinabi niini sa Banat News kagahapon nagkanayon nga sila si Jerry Nebria, 29-anyos, taga sitio Sambagan sa maong siyudad ug ang kauban niining si Amecito Tagupa, 22, taga sitio Bacay, lungsod sa Minglanilla nga gikatahapang mga tulisan. 

Si Nebria nasakmitan og usa ka kalibre .38 nga revolver nga dunay duha ka buhing bala ug napulo ka pulgadas usab nga kutsilyo ang nasakmit gikan kang Tagupa.

Si Nebria ug Tagupa ang sakay sa usa ka Yamaha nga motorsiklo nga kolor puwa nga walay plaka ug misuway unta sa paglikay sa checkpoint apan naapsan kini sa mga polis.

Ang polis nga nag-checkpoint ang gipangulohan ni Inspector Rolando Ong gilangkuban sa theft and robbery section (TRS) nga gipangulohan ni PO3 Arnold Damasco ug sa grupo sa Talisay City Intelligence Bureau (TCIB). Si Nebria ug Tagupa ang natingkagol hangtud karon sa Talisay City detention cell ug ang gigamit nilang motorsiklo ang gi-impound sa mga polis ug naa nahimutang sa police station sa barangay Poblacion. – BANAT NEWS