Dispatser giluba kritikal

CEBU - Kritikal ang kahimtang sa usa ka dispatser nga gi-unay og dunggab sa laing dispatser nga iyang gikalalis didto sa barangay Sangi siyudad sa Toledo niadtong Martes sa gabii.

Ang biktima mao si Dennis Tolen, 28, ulitawo, taga Purok Tisa,Sangi ug usa ka dispatser, samtang ang suspek mao si Rolando Bacalso, 43, minyo, taga Sitio Caimito sa barangay Sangi gihapon ug usa usab ka dispatser.

Matud ni SPO2 Carmilito Hornales sa Toledo City Police Station nga nahinabi sa Banat News nga nagkalalis ang biktima ug suspek sa atubangang bahin sa Arbees bakeshop sa maong lugar kalabot sa ilang pangita nga miresulta sa ilang panag-away.

Ang suspek nga wala na makalahutay sa ilang lalis milanit sa iyang pamingko ug dihadiha giduslak ang biktima.

Ang biktima usab nga wala makabantay nasabak sa tiyan ug milapos sa luyong bahin sa payod niini ang tumoy sa hinagiban.

Ang mga tawo nga nakasaksi sa maong hitabo maoy mitabang sa biktima sa paghatod niini ngadto sa Toledo City District Hospital apan girekomendar kini sa mga doctor nga ipa-deretso sa tambalanan dinhi sa dakbayan sa Sugbo.

Matud ni SPO2 Hornales wala maka-eskapo ang suspek human sa hitabo kay na-abtan kini sa mga mirespondi nga polis ug gibalhug dayon sa prisohan sa kapolisan sa Toledo samtang gihikay pa ang kasong isang-at batok kaniya. (BANAT NEWS)