Mayor misumbong sa Ombudsman

CEBU – Midangop sa buhatan sa Ombudsman Visayas si Mayor Lakambini Reluya sa lungsod sa San Fernando, Cebu ug iyang gisumbong ang bise mayor nga si Abe Canoy ug ubang sakop sa konseho nga mibabag sa pagpalusot sa ilang gahin karong tuiga.

Gibutyag ni Mayor Reluya sa Banat News nga duha na ka bulan karon nga wala ma-sweldohi ang mga kaswal ingon man job order nilang kawani kay gilaslasan og maayo sa konseho ang giduso sa mayor nga proposed budget.

Si Reluya miduso sa maong budget niadto pang bulan sa Marso sa kantidad nga P69 milyones, apan matud niya gilaslasan kini ug gihimo nalang P55 milyones.

Matud sa Mayor nga apektado gyud ang basic services sa ilang lungsod tungod kay ang mga buhatan ubos sa office of the mayor maoy nasabak ning maong paglaslas sa gahin.

Gitumbok ni Mayor Reluya ang apiktadong mga opisina mao ang engineering, market and slaughter house, water services, lakip na budget alang sa suholan sa mga job order employee ug mga kaswal.

Apan ang labing grabe mao ang sports development , intelligence ug engineering department kay wala gyud hatagi og gahin sa konseho matud pa ni Reluya.

Ang gireklamohan og maayo sa mayor mao ang wala atimana nga supplemental budget nga balor og P11 milyones nga alang unta sa suholan sa mga kawani ug ubang galastuhan sa lungsod samtang wala pay gahin nga gi-aprobahan.

Gitumbok hinuon sa mayor nga politika ang hinungdan ning tanan kay buot lang sa iyang mga kaatbang nga surambawon ug pakamangon ang pangalagad sa lungsod aron siya’y lus-an og basul sa mga katawhan.

Nasayran nga bugtong ang SK federation president lang nga si Ritchie Reluya, anak sa mayor, maoy kaalyado ni Mayor Reluya diha sa konseho kay ang ubang mga konsehal kaalyado man ni Bise Mayor Canoy gawas lang kang Butch Enad nga independente og baruganan apan nag-schooling kini karon sa gawas. – BANAT NEWS