Pitlagong sa Argao milampos

CEBU - Dakong kalampusan ang pagpahigayon sa tinuig nga Pitlagong Festival sa lungsod sa Argao nga gisaksihan sa libuan ka mga bisita gikan sa nagkalain-laing mga lungsod lakip na sa mga balikbayan.

Si Mayor Edsel Galeos mipadayag sa iyang pasalamat sa mga Argawanon sa suportang nakaingon sa kalampusan sa maong festival.

Karong tuiga gihulagway nga dakong kalihukan sa lungsod sa Argao gumikan kay gisaulog man usab sa tibuok lungsod ang ika-400 na ka tuig gikan pagkahimong lungsod gikan sa iyang pagka barangay niadtong 1608.

Gipasalamatan usab ni Galeos si Senador Juan Miguel Zubiri nga mitabang sa lungsod aron paghuman sa Municipal Gymnasium diin gihimo ang Pitlagong Festival.

Samtang si Senador Zubiri nga misaksi sa maong kalihukan midayeg sa mga opisyal sa maong lungsod tungod sa gipakitang importansya sa katawhan sa maong kalihukan ug maoy gituuhan niining nakapalambo sa lungsod sa Argao.

Nakita ni Zubiri nga nahimo kini gumikan sa gipakita nga paghiusa sa mga opisyal ug katawhan sa lungsod sa Argao.

Midaug sa Festival mao ang mga partisipante gikan sa Argao Central Elementary School; Best in Costume ug Best in Street Dancing sa St. Michael School sa maong lungsod.

Gawas sa Pitlagong Festival gihatagan usab og pasidungog ang mga molupyo sa lungsod nga nakatampo sa garbo sa ilang lugar.

Nalakip sa gipasidunggan mao si Presidential Management Staff, Director General Cerge Remonde ug kanhi Chief Justice Hilario Davide, Jr. sa Korte Suprema. – BANAT NEWS