Bank collector gitulis

CEBU - Gitulis sa tulo ka mga armadong lalaki nga pulos nagtaptap og sinina sa ilang mga nawong ang usa ka collector sa bangko diha sa katubhan sa barangay Caduawan lungsod sa Tabogon niadtong Martes sa alas 5:40 sa hapon.

Ang biktima mao si Orlando Bautista Abuyo, 26, minyo ug molupyo sa barangay Dapdap, San Remegio, collector sa Fairbank nga nagbase sa siyudad sa Bogo.

Nakuha gikan sa biktima ang usa ka itom nga knapsack bag nga dunay sulod nga P27 mil   nga koleksyon ingon man usa ka passbook sa maong bangko.

Tulo ka mga batan-ong lalaki nga ang usa armado og shotgun ug mga kalibre .38 rebolber ang duha ug pulos naghukas sa sinina ug gitaptap sa ilang mga nawong ang mitulis kaniya.

Matud ni SPO2 Jonalito Saladaga sa Tabogon Police dihang nahinabi sa Banat News gikan nga nangoleksyon ang biktima sakay sa service niining motorsiklo sa usa ka Epifania Pedrano nga taga Libaong lungsod sa San Remegio.

Dihang paingon na balik sa opisina niini kalit lang nigawas sa libon nga katubhan ang tulo ug nipara kaniya ug mideklarar og tulis.

Tungod sa iyang kahadlok gitugyan niini ang iyang knapsack nga itom nga gisudlan sa kwarta ug daling mibalik sa katubhan ang mga suspek samtang ang biktima igo nalang nidangop sa kapulisan aron magpa-blotter. – BANAT NEWS