99.99% si Marimon gyud - DVI

Subling gipasabot sa mga eksperto sa DNA testing nga ang patay’ng lawas sa kapitan sa nalunod nga barkong MV Princess of the Stars nga si Captain Florencio Marimon Sr. mao gyud ang gilubong sa mga kabanay niadtong milabay’ng semana.

Si Dr. Renato Bautista, pangulo sa National Bureau of Investigation –Disaster Victims Identification mibutyag nga 99 porsiyento ang gitugyang patay’ng lawas ngadto sa pamilyang Marimon nga gilubong usab dayon diha sa Pardo Municipal Cemetery mao ang kapitan.

Dunay mga kabanay sa mga pasahero sa nalunod nga barko ang wala makumbinsir niini ug mipasangil nga posibleng buot lang taguon sa mga kadagkoan sa Sulpicio Lines ang maong kapitan aron malikay sa imbestigasyon.

Ang DNA test maoy giisip nga labing moderno, epektibo ug 100 porsiyentong husto nga resulta kumparar sa ubang pamaagi tungod kay kini migamit og siyensya ug dili mata-mata.

Ang DNA testing magkinahanglan og samples gikan sa patay’ng lawas nga buot mailhan ug sa mga samples gikan sa mga buhing kabanay sama sa ginikanan, mga anak ug igsuon sa na-missing nga tawo.

Pinaagi sa modernong teknolohiya makumparar ang post mortem samples sa patay’ng lawas ngadto sa ante mortem sample sa mga buhing kabanay nga mihatag niini.

“I assure you, captain Marimon’s DNA was a perfect match to that of his two sons…to the point that the probability that came out is 99.99 percent,” sumala pang Bautista sa mga tigbalita.

Atol sa paggawas sa resulta sa DNA results diin naapil ang pangalan ni Marimon wala kini dayon mapagya sa media sanglit mismong ang mga kabanay sa kapitan wala motugot sa pagpa-interview.

Kini gumikan usab sa giingong bati nga mga nanggawas nga balita nga wala ikahimuot sa mga kabanay human mogawas sa imbestigasyon sa Board of Marine Inquiry nga dunay kasaypanan ang kapitan sa paghimo og desisyon bisan paman sa hulga sa bagyong Frank.