'STARS' victims sugdan og ugkat

CEBU - Gikatakdang madala na dinhi karong sunod semana o sa unang semana sa bulan sa Oktobre ang unang hut-ong sa gibana-banang 300 ka mga patay'ng lawas sa mga pasahero ug crew nga gituuhang na-trap sa ilawom sa nalunod nga MV Princess of the Stars sa Sulpicio Lines Incorporated.

Si Sr. Supt. Anthony Obenza, tigpamaba sa Police Regional Office-7 ug kasamtangan liaison officer sa Disaster Victims Identification (DVI) team nipahibawo niini kagahapon.

Kini human usab mahabwa na ang krudo sa maong barko sa mga sakop sa Titan Salvage Corporation nga maoy gi-hire aron pagkuha niini ug ingon man ang mga patay'ng na-trap sa ilawom.

Matud ni Obenza sunod semana ipatawag sila ni Bise Mayor Michael Rama uban sa National Bureau of Investigation (NBI) team nga gipangulohan ni Dr. Renato Bautista kun unsay himuon sa DVI-NBI team inig abot sa 300 ka mga patay'ng lawas.

Nidugang si Obenza nga dugangan nila og upat ka container vans diha sa Cebu International Port tungod sa umaabot nga daghang patay'ng lawas.

Apan nagtuo si Obenza nga mga skeleton nalang ang madala dinhi tungod sa pagdudang nangabungkag na ang mga lawas tungod kay milanat na og tulo ka buwan sukad nalunod niadtong Hunyo 21 didto sa kadagatan sa Romblon.

Hinuon nipasalig si Obenza bisan paman mauli ra gihapon sa mga tagtungod ang mga bukog tungod sa DNA kini tungod kay bukog man usab nga femur bone ang kuhaon sa DVI-team.

“Mas lisod ang pagkuha sa DNA test kay bone to bone naman, pero at least mailhan ug mauli sa mga kabanay ang mga bukog..naglisod atong team sa taga Mindanao kay wala na diha ang mga kabanay.

Giangkon ni Obenza duna pay daghan nga mga kabanay ang wala pa makuha-i og DNA test ilabi na niadtong tua magpuyo sa Mindanao.

Niini nanawagan si Obenza sa taga Mindanao sa pag-ari dinhi sa Sugbu inig abot sa 300 ka mga patay aron makuhaan sila og DNA test diin mahimong moadto sa Cosmopolitan diha sa Sanciangko o ba kaha diha sa PRO-7.  (BANAT)