Taga LTO gipusil

CEBU – Usa ka kawani ni Mayor Jonas Cortes sa Mandaue City gidakop sa kapolisan human kini makapusil sa kawani sa Land Transportation Office (LTO) sa maong dakbayan sa miaging gabii.

Ang suspetsado mao si Rochwald Bering, 27, minyo nga taga sitio Tribunal sa barangay Centro, Mandaue City, samtang ang biktima mao si Roderick Ramayla, 25, ulitawo nga temporaryong nagpuyo sa Looc, Mandaue City apan lumad nga taga Poblacion, Ronda, Cebu.

Si PO2 Herbert Pelayo nga nahinabi sa Banat News miingon nga  ang biktima nakig-inom sa iyang mga barkada sulod sa ALU Food House sa dalan P.Gomez, sa barangay Centro sa mga alas 11:00 sa gabii.

Unya nahiabot si Bering nga giingong hubog nang daan unya gitimbaya kini sa biktima uban sa paghatag og usa ka tagay sa alak nga ilang giinom.

Apan inay magpasalamat, wala kini dawata sa suspetsado ug dayong lakaw uban sa bahad nga pahuwat siya kay magkuha siya'g armas.

Diha-diha human sa pipila ka gutlo nahibalik dayon ang suspetsado ug gipusil dayon ang paa sa biktima.

Human lapsi sa usa ka bala sa .38 kalibre nga revolver ang paa sa biktima, mihana na og dagan ang suspetsado aron makasibat, apan tayming kaayo nga maoy pag-abot sa mga sakop sa Special Weapons and Tactics (SWAT) nga gipangulohan ni SPO1 Jesson Rosende, PO3 Larry Gonzales, PO2 Randy Chavez ug PO1 Dendie Trangia.

Nahitabo makadiyot ang ginukdanay apan naapsan ra gihapon ang suspetsado hinungdan nga naposasan dayon kini.

Nasayran nga  ang suspetsado nadestino sa Janitorial and Security Office (JASO) sa City Hall kinsa gikatahapang may atraso sa biktima.

Gidala dayon sa tambalanan ang biktima aron matambalan ang samad niini. – BANAT NEWS