Umento sa suholan sa gov’t. Ok

Uyon si Senate President Manny Villar sa 100% nga umento sa suholan sa mga empleyado sa gobiyerno ug dili ngadto sa presidente sa nasud hangtod na sa mga kongresista.

Kini maoy baruganan ni Villar atol sa pakighinabi sa mga sakop sa media sa iyang pagtambong sa Liga sa mga Barangay sa Lalawigan sa Iloilo nga mipahigayon sa ilang convention dinhi sa dakbayan sa Sugbu kagahapon sa buntag sa Cebu Grand Convention Center.

Matud pa ni Villar law-ay kaayong paminawon nga ang sama kaniya nga mga senador ug ang anaa sa Ubos Balay Balauranan modawat og dobleng umento sa sweldo unya daghang katawhan ang gigutom nga maoy labaw nga nagkinahanglan.

Ang maong lakang gipasiugdahan ni Budget Secretary Rolando Andaya nagkanayon nga adto pa sa 2009 moepekto ang maong plano ug tuyo nga makakuha ang gobiyerno sa labing takos nga kawani.

Dunay pipila ka mga kritiko ang mikisi-kisi niini ug misaway nga bisan piso di angayang hatagan ang presidente og increase.

Si Andaya miingon nga kung dunay mahitabong increase di na makatilaw niini si Presidente Gloria Macapagal Arroyo, Bise Presidente Noli De Castro ug mga senador ug mga kongresista subay sa gilatid sa proposal ug kadto rang mga mosunod nga mapili sa eleksyon maoy makabenipisyo niini.

Gihagit hinuon ni Andaya ang si bisan kinsang mokandidato karon nga kung sila maoy makalingkod di nila dawaton ang increase sa iyang proposal.