400 budjong sikop

Gisakmit sa mga kapulisan ang usa ka trak nga “budjong”, matang sa kinhasong “endangered species” didto sa barangay Anapog lungsod sa San Remegio, Cebu niadtong Lunes sa hapon.

Gawas sa Izusu Elf ug 400 ka mga budjong, gisikop usab sa kapolisan ang drayber nga si Joseph Marcios Vallera Juanich, hingkod ug molupyo sa barangay Bakilid, siyudad sa Mandaue.

Matud ni SPO1 Ernesto Alburo sa San Remegio Police Station nga nahinabi sa Banat News nga ang maong mga kinhason paingon nang itumod sa dakbayan sa Sugbo.

Midugang si SPO1 Alburo nga gumikan sa tip nga ilang nadawat nianang alas 2:00 sa hapon, kalabot sa maong kinsahon, mipahigayon dayon sila'g checkpoint sa utlanan sa barangay Anapog ug barangay Tambungon ug didto wala kaipsot ang maong kontrabando.

Kaubang nagbantay sa checkpoint mao sila si SPO1 Nicolas Navales ,kinsa nadestino sa Police Environment Desk Officer inabagan sa mga municipal agriculturist nga sila si Roberto Villaganas ug Aida Mamanao.

Gumikan sa paglapas sa Section 11 ug Section 97 sa Akta Republika 8550 kon Illegal Export of Endangered Species and Illegal Fishing, gibalhog sa prisohan ang drayber nga si Juanich samtang gi-impound usab ang sakyanang de karga nga iyang gimaniho.

Namatikdan sa kapolisan ang hilabihang kaabtik sa drayber kay bisag gibali-bali nila kinig sukitsukit, wala gyud motug-an kinsay iyang amo o tag-iya ning maong kargamento.