Way ‘whitewash’ sa imbestigasyon

Gipasalig ni Cebu Provincial Police Office director Sr. Supt. Carmelo Valmoria nga way mahitabong white wash sa imbestigasyon batok kang PO1 Christian Peñafiel sakop sa Provincial Mobile Group (PMG) kinsa gikatahong nangulata niadtong niaging semana sa amahan ug anak sa lungsod sa Ronda.

Matud pa ni Valmoria nga iyang gitambagan si Mayor Esteban Sia sa Ronda ug mga kabanay sa namatay nga si Donnie Noel, 78, ipa-autopsy ang patay’ng lawas niini aron masiguro kun ang namatyan niini mao ba gyud ang bun-og sa pagkulata sa police.

Gitataw niini nga magpaabot una sila sa request sa mga kabanay ug ni Sia aron si Dr. Nestor Satur ang chief Medico Legal Officer sa Philippine National Police Crime Laboratory 7 maoy mohiling sa patay’ng lawas ni Noel.

Midumili hinuon paghatag og komentaryo kun gikulata ba gyud ni Peñafiel si Noel tungod kay pulos palang espekulasyon ang nahitabo sa pagkakaron hangtud nga wala pay resulta sa awtopsiya sa dili pa kini ilubong karong petsa 9 ning buwana.

Ang maong polis girelibuhan na gikan sa PMG ug gibalhin na diha sa Provincial Security and Service Group ug kung di kini motungha sa bag-ong assignment kini nga absent without official leave (Awol).

Nasayran nga ang amahan ug anak nga sila si Donnie Noel ug Russel Noel niadto sa police station sa Ronda human aron unta husayon ang gireklamo batok kang Russel sa mga silingan kabahin sa pagmaoy ug pagpanghasi niini.

Apan samtang gihimo ang pagsukit-sukit gikatahong kalit nga gisukmag ni Peñafiel si Russel ug dihang misanta ang amahan giapil niya kini og sukmag sulod mismo sa Ronda Police Station.

Ang tiguwang gikatahong nalamba ug nasawod sa lamesa apan human sa upat ka adlaw namatay kini ug giingong may lagom pa gihapon sa nawong.