Gidunggab patay sa pildero sa hantak

Patay on the spot ang usa ka lalaki ug samaran usab ang usa dihang sila gidunggab sa usa ka pildero sa hantak diha sa Purok Saging barangay Gun-ob dakbayan sa Lapulapu sa milabay’ng gabii.

Ang namatay mao si Roger Capampangan Lozano alyas Titing, 41, residente sa sitio Cagudoy barangay Basak dakbayan sa Lapulapu human madunggabi diha sa tuong dughan ug mga kamot.

Samtang naangol mao si Sexto Godinez Ymbong Jr. 37, residente sa barangay Looc sa samang dakbayan human madunggabi sa likod, aping ug mga kamot.

Gitumbok nga responsable sa pagpanungab mao si Jason Tolentin residente sa maong dapit kinsa matud pang SPO2 Rolito Jumao-as pildero sa hantak.

Gikatahong gikan ang tulo nagduwa og hantak sa maong dapit ug dihang napildi si Tolentin iyang nakita si Lozano ug Ymbong nga nag-inom sa maong dapit gumikan kay daugan sa maong sugal.

Gumikan sa kalagot ni Tolentin iya kining giduol sa tindahan ug dayong gipadunggab ang duha.

Si Lozano nakadagan ug nakasulod sa panimalay ni Randy Japico ug nakapangayo og tabang apan nabugtuan sa kinabuhi si Lozano sa tugkaran ni Japico.

Samtang si Ymbong dali gidala sa Mactabn Doctors ug anaa pa kini ubos sa obserbasyon sa mga mananambal samtang daling niikyas ang suspek una pa moabot ang kapolisan.