Bastos nga DVDs gisakmit sa CIIB

Naka-iskor na usab ang mga sakop sa kapolisan sa dakbayan sa Sugbu batok sa mga  pornographic materials human nila  gironda  ang mga tindahan niini niadtong miaging adlaw sa dalan Colon.

Sila si PO3 Bezabel Olmedo ug mga kaubanan sa Criminal Investigation and Intelligence Branch (CIIB) misuhid sa karaang sinehan human usab usa ka concerned citizen ang nanawag sa ilang buhatan ug misumbong nga gipang-display ang maong mga malaw-ay nga VCDs ug DVDs  sa lamesa.

Ang kapolisan nakasakmit sa tulo ka mga plastic trays nga DVD ingon man upat ka mga plastic tray sa VCD dihang ila pang naabtan nga dayag kaayong giplastada sa nahisgutang lugar ngadto sa publiko.

Apan ang kapolisan napakyas sa pagsikop sa mga naninda sa mga pornographic materials human dali kini nakadagan ug gibiyaan ang ilang mga tinda dihang nakapanimaho nga adunay mga polis.

Sa nasayran nga ang mga sakop sa Cebu Anti Indecency Board (CAIB) nga gipanguluhan sa ilang tsirman nga si Dr. Rene Joseph Bullecer kusganong nanawagan sa kapolisan sa pagsuhid sa mga aseras gumikan sa nagpadayong pagkatap sa mga pornographic materials bisan kun gidili kini sa dakbayan.