Nanglabay'g granada gipatay

Suspetsado sa pagpanglabay og granada sa Daanbantayan niadtong tuig 1999 gipusil patay sa sitio CCYO barangay Poblacion 3 dakbayan sa Carcar kagahapon sa mga ala 1:45 sa hapon.

Ang biktima mao si Allan Lapingcao, kasamtangang nagpuyo sa sitio Lamakan Barangay Valladolid dakbayan sa Carcar ug lumad kini sa lungsod sa Barili.

 Base sa pasiunang imbestigasyon nga nasuta ni Carcar Police Chief Supt. Teofilo Siclot sa dapit nahitabuan nga naglakaw si Lapingcao dihang kalit kini gipusil makatulo ka higayon sa wala pa mailhing mamumuno.

 Samad sa dughan, ulo ug sa agtang agi sa usa ka wala mailhing klase sa rebolber ang hinungdan sa iyang hinanaling kamatayon ug wala na gani madala pa sa tambalanan.

Base sa mga pamahayag sa mga residente sa maong dapit usa ra ka tawo dayong dagan paggawas sa dalan ug wala na kini maapsi sa mga sakop sa barangay tanod sa maong dapit.

 Nabati usab sa mga residente ang tulo ka sunodsunod nga buto ug sa ilang pagsusi si Allan Lapingcao na diay ang nahagba sa kadalanan sa maong dapit.

 Matod pa ni Siclot nga base sa ilang rekord si Lapingcao nalambigit sa mga ginagmay'ng kawat sa dakbayan sa Carcar.

 Dugang pa ni Siclot nga si Lapingcao usab ang prime suspect sa paglabay og granada sa usa ka diskohan sa Daanbantayan niadtong  1999 diin daghan ang namatay ug naangol.

Nahitabo kini diha sa sitio Irid, barangay Bitoon sa nahisgutang lungsod diin dunay gipahigayong open disco tungod sa piyesta, duha ka tawo ang dead on the spot, duha ang grabeng naangol ug namatay sa tambalanan samtang dul-an 20 ka tawo ang nangaangol.

Gikatahong dunay gikalagutan si Lapingcao ug hubog siya niadtong tungura paglabog sa maong granada.

 Matod pa ni Siclot dili pa siya sigurado kung nahuman na ba ang sentensiya ni Lapingcao sa krimen nga iyang nahimo ug kung kanus-a pa kini nakagawas sa bilanggoan ug naabot sa dakbayan sa Carcar.