Selosong suspek sa patay dakpan

Nadakpan kagahapon sa kaadlawon ang suspetsado nga nakapusil patay og drayber ug nipusil ug nidunggab sa agalon sa iyang asawa sa bukirang barangay sa sitio Solima barangay Cotcot, Liloan niadtong Domingo sa alas 11:00 sa gabii.

Ang suspetsado nga nadakpan atol sa gilusad nga hot pursuit operation sa kapulisan naila nga si Metodio Bughaw, 55 anyos, molupyo sa nahisgutang lugar.

Matod ni SPO1 Dennis Malinao, imbistigador sa Liloan Police Station dihang nahinabi sa Banat News nadakpan nila ang suspek kagahapon sa alas 2:00 sa kaadlawon nga natulog sulod sa eskwelahan sa barangay Cabadiangan lungsod sa Compostela.

Si Bughaw maoy responsable sa pagpusil patay sa usa ka Teodoro Casas Capuyan, 51, taga barangay Tabok siyudad sa Danao ug drayber sa negosyante nga si Adoracion Valencia Abaigar, 46, taga Guiwanon lungsod sa Compostela.

Ang biktima nga si Teodoro nakaangkon kini og samad pinusilan sa liog hinungdan sa kamatayon niini samtang ang iyang amo napusilan usab sa suspek sa paa ug gidunggab pa sulod sa upat ka higayun sa iyang liog ug abaga ug nalandig karun sa usa sa mga tambalanan dinhi sa dakbayan.

Subay sa gihimong imbestigasyon ni SPO1 Malinao nasuta nga ang suspek nagselos sa iyang asawa nga si Editha nga nagtrabaho isip katabang sa maong negosyante nga nagduda nga dunay relasyon tali sa gipatay. (Darrel A. Carumba)