Natagak Sa Maguikay Flyover
Patay ang
Si SPO3 Vicente Benabaye nga maoy imbestigador sa trapiko sa kapolisan dakbayan nga nahinabi sa Banat News miingon nga ang aksidente nahitabo alas 3 pasado ang takna sa miaging kaadlawon.
Giila niya ang namatay nga mao si Brendo Ycot, 30, ulitawo nga taga Busogon, San Remegio ug ang backrider nga wala pa mailhi, dali nga gidala sa tambalanan.
Ang drayber sa gikasungag nga delivery van nga nagdala sa plate number GCL 588 nga gipanag-iya sa Nature Spring Water Corporation ang gimaneho ni Rics Restauro, 37, nga taga Zone Paliya, sa barangay Paknaan.
Dugang pa ni SPO3 Benabaye nga ang motorsiklo nga giluwanan sa duha ka biktima nakasinati usab og grabeng kadaut ug temporaryong gi-impound sa Jadewell compound sa Reclamation Area sa dakbayan sa Mandaue samtang ang drayber gibalhog sa bilanggoan sa Police Station 1.
Si SPO2 Benabaye miingon nga si Ycot maoy nagmaneho sa motorsiklo kinsa ilang giugkat nga hapit usab mahagbong sa flyover apan napiit lang sa ligid sa delivery van human madaro paingon ngadto sa railing sa flyover.
Matud pa niya nga gikan sa dakbayan sa Sugbu silang Ycot ug nagpaingon sa lungsod sa Consolacion ug ang delivery van nagpaingon sa Carbon Public Market nga pulos kusog nga nagdagan kalit lang nga nagkasungag sa paghidangat sa tungatungang bahin sa flyover.
Gumikan sa kusog nga impact, ang backrider nalagpot didto motugpa sa sementadong dalan sa ubos sa flyover ug dali kining gidala sa Vicente Sotto Memorial Medical Center sa dakbayan sa Sugbu.
Dugang pa ni Benabaye nga ang backrider nga dili pa makasulti ang nagpabilin nga wala nila mailhi sanglit bisan ang pag-umangkon nga babaye ni Ycot wala usab makaila ug wala usab sila makakuhag identification card niini.
- Latest
- Trending
