CCPO i-'safe zone'

Nunot sa mga aksidente sa armas sulod mismo sa kampo sa Cebu City Police Office nagplano si Sr. Supt. Patrocinio Comendador nga himuon na gyung “safe zone” ang mga edipisyo sa maong kampo.

Kini human laing armas na usab sa usa ka polis ang aksidenteng nibuto sulod sa maong kampo niadtong milabay'ng gabii samtang nagtangtang og bala.

Giimbestigar na karon sa Criminal Investigation and Intelligence Branch si PO1 Esmeraldo Quillosa, human mibuto ang kalibre 45 pistola niini samtang nagtangtang sa bala niini diha sulod sa CIIB office.

Ang bala miigo sa bungbong ug milapos ngadto sa lobby paatubang sa buhatan ni Comendador swerte nalang nga walay naigo sa maong insidente apan nakapaalarma na kini sa maong kampo.

Dili palang dugay laing polis sa CIIB ang aksidenteng nakablitan ang armas ug adto niigo sa semento samtang iyang armas gisukbit palang sa holster niini, wala hinuon gihapoy naigo sa maong insidente.

Apan alang sa mga polis diha sa maong kampo nagka-peligro ang kahimtang nila kung ingon na niini kanunay ang mahitabo. Niadtong Pebrero 2006 usa ka policewoman ang aksidenteng naigo sa laing polis diha gihapon manukad sa lobby ug ang bala nilagpas sa bungbong ug naigo sa likod ang policewoman ug namatay.

Nunot niini sabutan ni Comendador ug mga opisyales ang pagbutang og duty policeman nga 24 oras nga mobantay aron maoy mo-inspect sa mga armas sa mga polis nga mosulod sa edipisyo sa CCPO aron masigurong walay armas nga dunay bala ug magazines.

Did-an na usab ang mga polis nga makapahigayon og dry-firing practice sulod sa ilang buhatan ug adto nalang gyud kini himuon sa firing range.

Sumala pa usab ni Sr. Insp. George Ylanan sagad mahitabo ang aksidenteng susama niini panahon nga molakaw padulong sa operasyon ug sa pagpauli na.

Ipailawom usab si Quillosa sa gun safety seminar ug gun proficiency training aron makahibalo sa pag-amping.