7 ka Cebuano titser mi-perfect sa Japanese Math test

Pasidunggan ang mga magtutudlo nga mipaubos sa Japanese Math Certification Test nga naila sa Japan nga Suken nga gipahigayon niadtong miaging Enero nga nakakuha og perfect score.

Kini maoy gipahibawo ni Cebu city hall education Consultant Joy Augustus Young nga maoy naningkamot nga mapaubos ang mga magtutudlo sa siyudad sa nahisgutang pasulit.

Nasayran nga sa 2,295 ka mga magtutudlo sa dakbayan nga mipaubos sa Math Exam, 1,309 niini ang nakapasar kon 57 %.

Sa maong gidaghanon sa nakapasar sa pasulit, pito niini ang nakakuha og perfect score ug walay bisan usa ka item nga sayop.

Ang pito mao sila si Loui Barinan ug Marites Vasquez sa Mabolo Elementary School, Amelita Cabardo sa Alaska Elementary School, Romebeth Balali sa Banawa Elementary School, Veronica Dado sa Don Vicente Rama Elementary School, Maricel Englatera sa Lahug Elementary School, ug Lynette Maglasang sa Inayawan Elementary School.

Ang Cebu City Schools Division maoy nagplano paghatag og pasidungog sa maong mga magtutudlo atol sa Division Executive Conference sunod semana.

Apan gusto ni Young nga mopaso usab ang nahisgutang mga magtutudlo atol sa graduation aron modawat sa ilang certificate sa Suken.

Kini aron madasig usab ang ubang mga magtutudlo nga makakuha og certification sa sunod tuig nga pagpahigayon sa nahisgutang Japanese Math Certification Test.

“Para ma-encourage ang uban ba kay ako man gong naobserbahan nga dunay ubang mga magtutudlo nga wala mohatag og igong gibug-aton sa exam,” sumala ni Young.

Gawas niini, ang pipila ka mga magtutudlo giingong nagbagulbol usab nga gipa-review pa pipila ka adlaw sa wala pa ipahigayon ang pasulit.

Ang Education Consultant mirekomendar usab kang Mayor Tomas Osmeña nga ipamantala ang pito ka mga magtutudlo nga nakakuha og perfect score sa Suken.

Nasayran nga didto sa Japan, ang mga tinun-an lang niini ang mokuha sa nahisgutang pasulit ug dili ang mga magtutudlo.