Faelnar walay imbitadong politiko

Giklaro ni Association of Barangay Council (ABC) President Eugenio Jingjing Faelnar nga walay mga dagkong politiko sa kauluhan nga iyang imbitahon  sa iyang ikaduhang paghurar karong Enero 11 sa  ABC building sa South Road Property (SRP).

Si Faelnar mohurar atubangan ni Mayor Tomas Osmeña uban sa ilang mga board of directors sa ABC.

Si Faelnar miingon nga alang kaniya simple lang ang maong okasyon gumikan kay seremonyas nalang kini human sila manumpa niadtong  Enero 2 atubangan ni Kapitan Benjamin Zabate sa Sawang Calero.

Matud pa niini nga wala siya mangimbitar og mga dagkong politiko gikan sa kauluhan ug si   Osmeña lang ug ang kapikas sa kinabuhi niini ug ubang mga opisyal sa City Hall.

Dugang pa niini nga anaa na lang unya sa iyang mga kaubanang kapitan kun mangimbitar kini og mga dagko ug inilang politiko sa maong kalihukan.

Sa nasayran nga bisan pa man sa mayoriyang kadaugan ni Faelnar sa eleksiyon sa ABC aduna gihapoy mga kapitan nga sakop sa BOPK nga nasagmuyo kaniya.

Hinungdan nga si Faelnar nagtinguha  nga mabalik ang kompiyansa sa iyang mga kaubanang kapitan apil na ang mga sakop sa oposisyon kini tungod ug alang sa ilang pagpatuman sa mga programa sa mga barangay.