P29M danyos gibilin ni Lando

Mokabat sa P29 milyones  ang naangkon nga danyos sa mga pananom nga utanon, saging, mais ug humay dinhi sa Central Visayas nga gibilin sa bagyong Lando nga miigo dinhi sa Sugbu dili pa lang dugay.

Subay sa rekord gikan sa Department of Agriculture (DA-7) ang amihanang Sugbu ug ang amihanang Negros Oriental maoy nakaangkon og labing dako nga kadaot nga gibilin sa maong bagyo.

Matud ni DA-7 regional director Eduardo Lecciones sa dihang nahinabi sa Banat News nga ang Canlaon City,  Negros Oriental maoy nakaangkon og dakong kadaot sa ilang mga pananom nga bugas mais ug humay nga gibanabanang miabot og P10 milyones  wala pay labot ang P9 milyones  nga kadaot niini sa pananom nga saging.

Gisundan kini sa lungsod sa Villahermoso nga nakaangkon og P1.1 milyones nga danyos sa ilang mga pananom nga saging ingon man tunga sa milyon ka pesos sa pananom sa humay ug mais.

Samtang dinhi sa Sugbu, gibutyag ni Lecciones nga ang isla sa Bantayan maoy nakaangkon og dakong kadaot sa ilang pananom nga mais nga miabot og P5 milyones wala pay labot sa ubang klase sa mga pananom.

Samtang didto sa siyudad sa Toledo miabot og P700 mil ang danyos sa ilang pananom nga mais ug P850 mil nga kadaut sa pananom nga saging.

Samtang didto sa Tuburan nakasinati lang kini og gamay'ng kadaot sa ilang pananom sa saging, mais ug utanon nga gibanabanang miabot og P240 mil.

Hinuon gibutyag ni Lecciones nga partial pa ang mao nilang nahipos nga impormasyon tungod kay nagpaabot pa sila sa ubang mga lugar nga mopadangat sa report sa mga kadaut niining naangkon mugna sa  milabay'ng bagyo.