Mananaug sa brgy. ug SK gipahalipayan

Gipahalipayan ni kanhi Mayor Thadeo Ouano ang tanang mananaug sa gipahigayong synchronized Sangguniang kabataan ug barangay election.

Nunot sa maong pagpahalipay iyang gipanghinaot ang kahiusahan ug ang pagtuman sa ilang mga kaakuhan alang sa kalambuan sa tagsa-tagsa nila ka mga barangay.

Dugang niyang gipanghinaut mao ang kahiusahan sa maong mga barangay official sa midaug ug sa mga napilde ug magtinabangay sa pagpalambo ug pagpatuman sa kahapsay ug kalinaw.

Si Antero Cana, tigpamaba ni  Ouano nga gikahinabi sa Banat News miingon nga ang pagpadangat og pahalipay sa tanang mananaug alang sa pagpakita sa kahiusahan sa mga Mandauehanon.

Gitataw niya nga ang pagbahinbahin sa mga barangay official maoy makapakgang sa kalamboan maoy hinungdan nga gitinguha sa kanhi mayor ang kahiusahan.

Sa nasayran nga mayoriya sa mga midaug sa miaging barangay ug SK election mao ang mga kaalyado ni Mayor Jonas Cortes.

Naglakip niini mao sila si kanhi Konsehal Glenn Bercede nga midaug isip barangay kapitan sa Banilad ug Kapitan Damaso Tumulak sa barangay Labogon nga nasublian sa iyang ikaduhang termino.

Si  Bercede maoy tandem ni Mayor Jonas Cortes sa Team  Honesty  apan naparot ug maoy midaug si Bise Mayor Carlo Pontico Fortuna nga tandem usab sa magpapatigayon nga si Joveto Thadeo Jonkie Ouano sa Power Team 4 nga anak ni kanhi Mayor Ouano.