Nangihi gipusil

Naangol ang usa ka batan-ong lalaki sa dihang kalit lang   gipusil samtang nangihi sa  national road  sa barangay Jagobiao, dakbayan sa Mandaue sa miaging gabii.

Si SPO1 Selviriano Aparicio miila sa biktima nga mao si Erwin Mosqueda Godinez , 21 anyos, ulitawo nga taga Tayud, Consolacion.

Matud pa niya nga giduol kini sa wala mailhing lalaki samtang nangihi ug gitionan sa armas nga kalibre 357  kinsa dali usab nga nakatapi ug nakigdumog niini.

Dugang pa ni SPO1 Aparicio nga  dihang nagdinumogay ang armas sa wala hiilhing lalaki ang kalit lang miboto ug natapsingan ang paa ug liog sa biktima.

Si SPO1 Aparicio miingon nga daw gikuyawan ang wala hiilhing mamumuno dihang nagkadugo na ang liog ug paa sa biktima nga maoy nakaaghat sa pagkaratil og dagan pahilayo sa maong lalaki.

Ang biktima dali usab nga gidala sa Eversely Child Sanitarium Hospital nga nahimutang duol sa maong lugar ug padayon kining giatiman sa mga doctor.