Security camera dako’g papel vs. tulis

Nailhan na sa kapolisan ang nagtulis sa tulo ka gasoline station sa dakbayan sa Mandaue ug dakbayan sa Sugbu niadtong miaging Biyernes sa kaadlawon.

Si Inspector Ramon Villar, hepe sa  City Intelligence Investigation Detection and Management Division sa Mandaue City Police Office (MCPO) ang mipadayag kinsa nagdumili lang sa pagbutyag sa mga pangalan niini.

Matud pa ni Villar nga grupo sa lokal nga mga tulisan ang mga suspetsado kinsa lahi usab nga pundok sa mga nagpasiugda sa mga nangaging pagpanulis sa dakbayan sa miaging mga bulan.

Si Villar miingon nga dako kaayo og gikatampo ang hidden security camera sa Shell gasoline station sa ilang pag-ila sa mga tulisan nga naglakip sa usa ka batan-ong lalaking mistiso Insik.

 Ang mestiso Insik maoy nakuhaan og hulagway sa surveillance camera  nga maoy hinungdan nga ilang nailhan ang usa sa mga suspetsado nga Insikon og mata.

Si Senior Superintendent Rodel Calungsod mipadayag usab sa kasamtangan karon niyang gihimo mao ang pag-umol sa special team nga maoy iyang gitahasan sa pagsikop sa mga suspetsado nga mga tulisan.

Nunot niini si Konsehal Carlo Fortuna nga maoy chairman sa committee on Police, Fire and Penology sa konseho ang mipadayag sa iyang hugot nga suporta sa kalihokan sa kapolisan.

Dugang pa niya nga dali nga nailhan sa kapolisan ang mga suspetsado sa maong duha ka pagpanulis sanglit nakuha man ang pamayhon sa hidden camera sa Shell gasoline station.

“The close-circuit television has proven its effectiveness in crime detection and solution making it imperative for establishment to put one up in their offices,” panapos nga pamahayag ni Fortuna.