Sunog midanyos og P250 mil

Mokabat sa P250,000 ang gibanabanang danyos sa nasunog nga rattan factory ug boarding house sa dalan J. Plaridel, barangay Alang-Alang, dakbayan sa Mandaue nga gialarma alas 3:44 ang takna kagahapon sa kaadlawoln.

Gideklarar ni Mandaue City Fire Marshal Oscar Mayol nga hingpit nilang nakontrolar ang kalayo sa paglabay sa 10 minutos nilang pagpawong niini.

Si FO2 Cefriano Codilla, imbestigador sa kabomberohan sa dakbayan miingon nga gipanag-iya ni Dioscoro Cantel ang nasunog nga rattan factory ug gipanag-iya usab ni Maximo Sotto ang boardinghouse nga sikbit niini nga nalakip sa pagkasunog.

Matud pa ni FO2 Codilla nga base sa gitug-an kanila sa trabahante nga si Felomina Pagobo  nga ang kalayo nagsugod sa ikaduhang andana sa maong pabrika.

Dugang pa nga gitug-an ni Pagobo nga dali kaayo nga mikuyanap ang kalayo sa tibuok edipisyo nga ginama sa light materials nga maoy hinungdan sa pagkaugdaw niini.

Si FO2 Codilla miingon nga nawad-an sa ilang trabaho ang mga trabahante sa nasunog nga pabrika ug nawad-an usab sa ilang pinuy-anan ang mokabat sa 30 ka pamilya nga nagpuyo sa maong boarding house nga nasunog.

Gipasabot ni FO2 Codilla nga ilang gisusi karon ang hinungdan sa pag-ulbo sa kalayo nga naglakip na niini ang faulty electrical o subra nga paggamit sa kuryente.