Estriktong titser ipatawag

Ipatawag sa Department of Education (DepED) Cebu City Division ang magtutudlo sa Sirao Elementary School nga gireklamo sa mga ginikanan sa mga tinun-an niini tungod sa grabeng pagka estrikta ug manapat pa sa mga bata.

Si DepEd Cebu City Division Supt. Dra. Lorna Rances nimando sa legal department pinangulohan ni Salustiano Jimenez sa pagsusi kabahin sa maong reklamo.

Nasayran gikan kang Rea Sarmento sa DepEd Cebu City office nga gitakda na nga ipatawag ang magtutudlo nga si Joan Laborte ug ang mga ginikanan nga nisang-at sa ilang petisyon batok kaniya.

Subay sa petisyon sa dili momenos 13 ka mga ginikanan ang mipasangil nga grabe ka estrikta ang maong maestra ug kun ma-late ang ilang mga bata guyoron paingon sa gawas .Dugang pa niini nga manapat gyud kini hinungdan nga duna nay mga bata nga mahadlok motungha ug gusto nalang moundang sa pagtungha, gani dunay uban ang gikatahong gi-transfer nalang sa ilang ginikanan ngadto sa laing tunghaan.

Niadtong adlaw’ng Miyerkules pormal nga nadawat sa maong buhatan ang petisyon sa mga ginikanan batok kang Laborte nga dali usab dayong gihimakak sa hingtungdan dihang na-interview sa usa ka lokal nga telebisyon.

Kun mapamatud-an nga balido ang maong pasangil sa mga ginikanan mag-atubang og mas lawom nga imbestigasyon ang maong magtutudlo..