Propsman sa Alcantara gipatay

Patay ang usa ka partisipante sa Festival of Festivals gikan sa lungsod sa Alcantara samtang duha ang naangol human sa pagpamusil nga gidudahang may kalambigitan sa fraternity diha sa dalan P. Burgos ug Zamora sa barangay Centro dakbayan sa Mandaue kagahapon sa kaadlawon.

Ang gipatay mao si Alberto Ando, 20, lumad sa barangay Palanas lungsod sa Alcantara usa ka propsman sa Bahandi Festival dance group sa lungsod sa Alcantara.

Laing nabiktima mao si Edisa Felicilda, 21,taga barangay Mantuyong dakbayan sa Mandaue ug giingong sakop sa Akrho ug Rolly Manaban, 20 , kauban ni Ando.

Gidudahang sakop sa Tau Gamma Phi ang suspek ug ang tuyo mao si Felicilda apan ang uyab niini nga si Ando maoy giantimano sa pagpusil sa ulo human pusila ang babaye, lakip sa gipusil ang nag-unang si Manaban.

Sa pamahayag ni Rolly Manaban sa Banat News, ang ilang grupo gikan pa nagpraktis sa Cebu International Convention Center ug kasamtangan nang nagpahulay diha sa eskuylahan sa Mandaue City Central School dihang miabot si Felicilda ug nagkasabot silang manggawas aron mamalit og sigarilyo.

Apan 200 palang ka metros gikan sa ilang paggawas usa ka tawo nga nagkalo ang ilang gikasugat ug sa pagsaylo niini kalit lang  silang gipamusil sa maong tawo.

Si Ando naigo sa ulo dapit sa dalunggan ug namatay diha dayon samtang si Felicilda samaran sa iyang tuong dapidapi ug sa iyang tuong tiil.

Si Manaban nga  nakadagan gipusil gihapon ug natapsingan sa walang kilid ug nabuslot ang t-shirt niini.

Si Felicilda gidala sa Mandaue City Hospital miangkon sa Banat News nga miyembro siya sa Akrho apan dili na kini aktibo ug nagduda siyang ang mamumuno sakop sa Tau Gamma Phi.

Si Katrina Romero nga maoy head sa ilang delegasyon ug maoy Federation Chairman sa Sanguniang Kabataan kun SK sa lungsod sa Alcantara mipadayag nga daan na siyang mipahimangno sa iyang mga tawo nga dili na mogawas sa tunghaan human sa ilang pagbansaybansay.

Gibasol ni Romero ang uyab ni Ando nga si Felicilda nga maoy migalgal ni Ando sa paggawas sa maong tunghaan, samtang lakip sa gibasol ni Romero mao ang gwardiya sa maong tunghaan nga maoy mipasulod ni Felicilda ngadto sa lawak ni Ando.

Hinuon matod pa ni Romero bisan paman dili sila mosibog sa Festival of Festivals nga gikatakdang ilang salmutan kagahapon sa hapon.

Ang Festival of Festivals maoy presentasyon sa lalawigan nunot sa ika 438 nga anibersaryo sa probinsiya sa Sugbu.

Si Merope Oporto ang OIC Principal sa Mandaue City Central School mibasol usab sa walo ka delegasyon nga anaa sa ilang tunghaan gumikan kay dili tanan ang nahatagan og ID aron nga maila kung kini mga sakop sa ilang delegasyon hinungdan nga nakasud si Felicilda.

Daan nang mipasidaan si Oporto sa mga delegasyon nga dili na pagawson sa tunghaan inig ka gabii.

Hangtod ning pagbalita padayon pa ang imbestigasyon sa kapolisan sa station  1 alang sa pag-ila sa maong responsable sa krimen.