Namoso gipatay

Patay ang usa ka 33 anyos nga lalaki nga gidudahang mamusohay sa mga babaye  nga  mga silingan niini human pusila samtang natulog sa gipuy-an niining payag sa lalaki nga kapuyo sa iyang gibuso.

Nahitabo ang pagpamusil pasado alas 10 sa miaging gabii diha sa Sitio Little Baguio, Inuburan, Naga, Sugbu.

Apan segun sa taho ang biktima gikatahong nanglili sa milabay'ng pipila ka adlaw ug nagduwa-duwa sa iyang kinatawo samtang giatubang ang babaye nga iyang gilili ug nabulabog sa mga silingan human mitumaw ang mga tabi-tabi hinungdan nga hilabihang sukoa sa suspek  nga kapuyo sa babaye nga iyang gibuso.

Ang gipusil ug namatay giila sa kapolisan nga si Mizeporo Pantonial, ulitawo ug residente sa maong dapit.

Samtang ang gitumbok nga mipusil sa biktima giilang si Kort Sigue, 24, ulitawo apan dunay kapuyo, lumad nga taga Tuburan ug kasamtangan nagpuyo sa naasoy'ng dapit.

Nasayran ang suspek nag-inom nang daan uban sa iyang mga higala ug nakahurot silag duha ka botelyang bino   ug  iyang nahibaw-an ang mga tabi-tabi parte sa iyang kapuyo nga giboso nga maoy nakapalagot og maayo sa suspek.

Sa gihimong pakisusi ni SPO1 Randolph Cres Tenebro sa Naga Police Station human makig-inom ang suspek  miuli kini sa ilang pinuy-anan ug mikuha og wala matinong kalibre sa armas ug giadto ang biktima nga natulog sa payag ug sa walay daghang estorya gipusil ang biktima katulo ka  higayon.

Ang biktima nakaangkon og tulo ka samad sa pinusilan sa agtang, dughan ug tiyan nga maoy nakaingon sa hinanaling kamatayon.

Dugang nasayran ni SPO1 Tenebro nga kanunay lilion ang kapuyo sa suspek samtang mag-inusara kini sa ilang gipuy-ang panimalay.

Gani matud pa ang biktima ilado na kaayo sa ilang lugar tungod sa iyang binuhatan nga manglili sa ubang kababayen-an ilabi na sa ilang lugar.

Ang kapolisan sa Naga padayon pang mipahigayon sa ilang manhunt operation batok sa suspek kinsa daling milayas palayo sa nahisgutang lugar.