9 anyos napagan sa panimawos

Usa ka 9-anyos nga batang lalaki ang namatay human mapagan sa pagpamusil sa panimalos sa usa ka 18 anyos nga lalaki dihang ang iyang maguwang gidunggab sa wala mailhing tawo gawas sa diskohan niadtong Domingo sa gabii diha sa barangay Cerdeña sa Malabuyoc.

Ang napusilan ug namatay giila sa kapolisan nga si Jaymar Timola Redido, tinun-an sa Grade 3 sa Cerdeña Elementary School ug residente sa sitio Pantag sa maong barangay.

Ang gitumbok nga nakapusil sa bata nailhan nga si Jose Arante Alcaya, mag-uuma ug residente sa sitio Tubod sa samang barangay.

Ang pagpamusil nahitabo human usa ka Jeryboy Arante, 21, gidunggab makadaghang higayon sa wala mailhing tawo diha gawas sa diskohan.

Ang igsuon ni Arante nga si Jose pagkakita sa gidangatan sa iyang maguwang kalit nga nibunot sa dalang wala matinong kalibre sa armas ug gipusil ang tawo nga nidunggab sa iyang maguwang.

Apan wala makaigo ang maong tawo ug didto hinuon napunta ang bala ni Redido diin niadtong tungora diha ra sa duol sa nahitaboan.

Si Redido naigo sa dughan ug nilapos ang bala sa buko-buko nga maoy nakaingon sa hinanaling kamatayon.

Matud pang PO1 Anticristo Santiago nga nahinabi sa Banat News ang bata gipangita na unta sa ginikanan kay mamauli na sila apan wala makit-i hinungdan nga gibiyaan nalang kini ug niuna sa pagpauli ang inahan.

“Luoy lagi kaayo ! Sus napagan lang ning bataa, wala man gud ni makit-i sa inahan nga nagpangita kay mamauli naman unta sila pero gibiyaan nalang, napagan hinuon.” matud pa ni PO1 Santiago.

Ang kapolisan nakakuha sa crime scene duha ka deformed slugs sa wala matinong kalibre sa armas.

Giangkon ni PO1 Santiago nga naglisod sila sa imbestigasyon kay nagdumili sa pagkooperar sa imbestigasyon ang mga residente, walay mosulti sa nahitabo bisan paman nga dunay nakakita sa insidente tungod sa kahadlok.

Ang suspek nga si Jose padayon pang gipangita sa kapolisan human milayas ug wala na igkita sa ilang lugar.