Most outstanding cop gipangita

Pormal nang gibuksan sa Kiwanis Club ang 2007 Search for Most Outstanding Policeman aron paghatag og pasidungog sa mga sakop sa Cebu City Police Office nga dunay maayong nahimong serbisyo publiko sa natad sa ilang pagpamolis.

Si Kiwanis Club President William Medici nagkanayon nga tungod niining mga kontrobersya, pagsaway, pagkawala nay salig sa katawhan sa kapolisan dako na kaayo og ikatampo sa ilang imahe nga dunay mga polis nga mapasidunggan.

Matud pang Medici angayang hatagan og pasidungog ang kapolisan aron makapataas sa moral sa uban pang mga polis nga matarong ang panerbisyo ug aron usab sila madasig.

“This is the Kiwanis’ will of expressing gratitude and support for the men and women in the police force. Who have shown exemplary performance in the discharge of their dedicated and hazardous vocation of keeping our city peaceful and safe 24-hours a day seven days a week,” asoy pang Medici.

Dugang pa niya nga isip usa ka public servant dili kalikayan nga makalimtan sa publiko nga ang mga polis tawo ra usab ug dunay mga panahon nga masipyat sanglit dili perpekto ang kalibutan.

Si Mayor Tomas Osmeña ang pinasidunggang dinapit sa maong panagtigum niawhag sa mga awardees na kaniadto ug sa wala pa mahatagi og awards sa maong pundok sa pagpadayon sa ilang maayong pagserbisyo.

Matud pang Osmeña nga natural lang sa usa ka tawo bisan pa kini kaniadto awardee dunay panahon nga mabutang sad sa kontrobersya, apan gidasig sa mayor nga di angayang mawad-an og paglaum.

“The important thing is that in every group there are good people and there are bad people. And even in the same persons they can be good and sometimes they can be bad, that’s human nature its not the fault of the Kiwanis or anyone else, but when someone does good it’s important that you put the spotlight on that achievement,” asoy pa ni Osmeña.

Nunot niini si Osmeña mipasalig nga suportahan ang Kiwanis sa ilang mga programa sanglit giisip niyang usa sa mga labing malampusong civic organization ang Kiwanis kumparar sa uban.

Ang nomination forms mahimong makuha diha sa buhatan sa Kiwanis Club, Rhine Marketing, CCPO, City Hall ug barangay halls.