Puya gikaon sa iro

Puya nga gikaon sa iro giilog sa nakakita nga security guard didto sa Aldea Subdivision, Sitio Mahayahay, Bankal, Lapulapu sa milabay’ng gabii.

Base sa pamahayag ni Elmer Dichos, duty guard sa Aldea Subdivision iyang nakita sa kasagbutan nga ang iro adunay gi-ungad-ungad nga putos ug sa dihang iya kining giduol kalit nga midagan ang iro ug iyang nakita nga usa diay ka puya nga gilabay sa walay puangod nga inahan ang gikaon sa iro.

 Gumikan sa maong sitwasyon dili na maila kun babae ba o lalaki ang maong puya hinungdan nga iya kining gitaho ngadto sa kapolisan.

Ang mobile 14 diin luwan si SPO3 Larry Baguio maoy miresponde ug gidala sa tambalanan ang maong bata apan gideklarar kini nga patay nang daan ug hinungdan nga ila nalang kining gilubong sa sam-ang Katoliko sa Humayhumay.