Suspek sa doktor murder nitawag

Nagpailang suspek sa pagpusil patay sa kanhi mayor sa Sta. Fe mitawag sa buhatan sa The Freeman/Banat News ug mihimakak sa mga pasangil diha kaniya.

Si PO1 Arnulfo Pigon, 38, kanhi residente sa Hipodromo ning dakbayan ug lumad nga taga Barangay Alegria sa lungsod sa Pio V. Corpuz, Masbate maoy gitumbok sa mga saksi sa pagpatay kang Rogelio "Docdoc" Illustrisimo,Sr. niadtong Mayo 2.

Si Illustrisimo gipusil patay sa nag-inusarang mamumuno diha sa atubangang bahin sa Provincial Comelec diha sa Kapitolyo. Si Pigon ug si Sta.Fe mayoralty candidate Domingo Zaspa gipasakaan na og kasong murder sa Task Force Illustrisimo niadtong Miyerkules.

Ang maong lalaki mitawag dinhi sa buhatan ning pamantalaan ug nagpailang si PO2 Pigon ug gipangita ang usa sa mga reporter sa igsuong pamantalaan nga The Freeman kinsa kaniadto nadestino sa Mandaue.

"Ma''am si PO1 Pigon ni, nganong ako man ang gipasanginlan nga tua man ko sa Manila anang hitaboa?" sumala pa sa maong caller kinsa dali-dali usab nga nananghid nga ibutang una niya ang telepono tungod kay dunay mga kadudahang tawo nga nagsunod-sunod kaniya.

Samtang ang task force commander nga si Sr.Supt. Patrocinio Comendador sa pakighinabi sa Banat News nagkanayon nga kung di gyud si Pigon ang mipatay kang Illustrisimo angayang mopakita kini ug mohatag sa iyang habig.

"Opportunity na unta to niya,pero nganong midagan man siya? Nganong nakahibalo man siya nga siya maoy target sa mga polis.Kung gusto gyud siya, he must come out to the open and make himself available so that the court will fast track the case and so justice would be serve," asoy pang Comendador.

Samtang ang gipasakaan usab og kaso nga si Zaspa kusganong mihimakak sa pasangil batok kaniya ug nagplanong mosang-at og kaso sa mga tawong mibuling-buling sa iyang pangalan.

Hinuon sumala pa sa manlalaban ni Zaspa nga si Atty.Joje Decal posibleng inig ka human na sa eleksyon sila mosang-at sa kaso sanglit wala pa sila makadawat og kopya sa kiha batok sa iyang kliyente.

Samtang gihangop ni Comendador ang maong kiha ug mitug-an nga kabahin ra kini sa ilang trabaho, gikalipay usab ni Comendador ang pag-ila ni PNP chief, Oscar Calderon sa pagkasulbad sa maong kaso ug gamiton kini sa CCPO aron ma-motivate ang iyang mga sakop.