Miss Mandaue ''07 idayon - Seno

Gitinguha nga ang pagpadayon sa Miss Mandaue karong tuiga bisan pa sa pagluwat sa katungdanan ni Emmarie "Lollipop" Ouano Dizon isip executive director sa maong indigay.

Si acting Mayor Amadeo Seno Jr sa iyang pamahayag miingon nga ilang gipaningkamutan nga kapangitaan og pundong salapi nga magamit alang sa Miss Mandaue 2007.

Dugang pa niya nga si Konsehal Wenceslao Gakit, chairman sa committee on budget and appropriation maoy gitahasan sa pagpangita og budget nga mokabat sa P1 milyon alang sa maong indigay sa kaanyag.

Si acting Mayor Seno miingon nga nahimo na nga tradisyon ang maong tigiay sa kaanyag atol sa tinuig nga pangilin ni Sr. San Jose, patron sa maong dakbayan.

Nakasinati og kakulian ang maong indigay sa kaanyag human si Ouano-Dizon nakahukom sa pagluwat sa katungdanan isip executive director sa Miss Mandaue 2007 isip kurtesiya sa pagkasuspenso sa iyang amahan nga si Mayor Thadeo Ouano.

Kauban ni Ouano nga gipaubos sa preventive suspension sila si Mayor Arturo Radaza sa dakbayan sa Lapu-Lapu ug ang mga kadagkoan sa Department of Public Works and Highways nga ang nakaingon niini mao ang kontrobersiya sa pagpamalit og lamppost atol sa Asean Summit.