CCMMPEL: Mayo 14 magmalinawon

Ang Cebu Citizens Movement and Maturation in People Empowerment and Liberation (CCMMPEL) dako'g pagsalig nga hingpit nga magmalinawon ang piniliay dinhi sa Cebu sa Mayo 14.

Si Arsobispo Ricardo Cardinal Vidal, chairman sa CCMMPEL, nagkanayon nga dako siyag pagsalig sa kaligdong sa mga Sugbuanon uban sa ka-intelihente ug kalantip sa pangutok niini paghimong limpyo ang maong piniliay.

Gibutyag ni Vidal nga sa maong higayon dili siya mosaksi sa piniliay dinhi sa Cebu tungod kay mahinungdanon ang iyang biyahe ngadto sa iyang lalawigan sa Marinduque.

Apan iyang gitugyan ang pagpaniid sa tibuok kalihokan sa election kang Executive Director Marilou Chiongbian sa CCMMPEL.

Si Vidal usa sa misaway pag-ayo sa "vigilante killings" dinhi sa Cebu nga nakapaluya sa mga kadagkoan sa gobiyerno sa siyudad sa pagpadasig sa kampanya pagpatay niadtong mga kriminal, tulisan, snatcher, ug uban pang kontra sa sosyidad.

Sukad sa maong pagpanaway ni Vidal, mihunong na usab ang utok sa vigilante killings sa pagpadayon sa maong linuog nga buhat ug giisip ni Vidal nga may kapuslanan ang iyang pagkabokal batok sa ilegal nga paghunos sa kinabuhi sa inosente.

Gisaway usab niya ang pipila ka mga pari nga nahilambigit sa mga kasong "sex scandal" dinhi sa lalawigan nga nakapatandog usab sa simpatiya sa ubay-ubay nga mga relihiyosong Katoliko.

Busa segun sa iyang napanid-an sa taga Cebu, si Vidal dako kaayo og pagsalig nga pinaagi sa kahamtong na sa pangisip sa mga Sugbuanon batok sa mga binuang, gituohan niya nga kun dunay mosuway pagpanikas o kaha pagmugnag kagubot karong Mayo 14, mayoridad sa mga Sugbuanon makigbatok gyud niini.

Alang sa arsobispo sa lalawigan sa Sugbu, dako ang iyang pagsalig nga bisan wa siya dinhi karong Mayo 14, tamdon sa mga Sugbuanon ang iyang mga mithi ug baruganan.