Gipusil, gitigbas sa mag-amahan

Giubol-ubol pagpusil ug pagkahuman gitigbas pa sa makadaghang higayon sa nagtinabangay nga amahan ug anak ang usa ka construction worker nga miresulta sa pagkamatay dihadiha sa miaging pasado alas 4 sa kaadlawon didto sa Sitio Bagacay, Paypay Daanbantayan, Sugbu.

Ang biktima giila sa kapolisan nga si Mario Arsolon, 40, minyo, usa ka mason ug residente sa maong lugar.

Ang gitumbok nga mipusil ug mitigbas sa biktima giila sa kapolisan nga si Jovencio Palpito, ug ang anak niining si Roberto, usa ka pintor ug kauban sa biktima kinsa nangikyas ug wala pa madakpi sa kapolisan ning paghimo sa balita.

Base sa taho sa kapolisan sa wala pa mahitabo ang pagpatay ang biktima ug ang suspek nga si Roberto nag-inom og ilimnong makahubog.

Kalit mitumaw ang panaglalis nilang duha sa wala matinong hinungdan nga miresulta sa pagyabo og bino sa biktima ngadto sa suspek nga si Roberto.

Gumikan sa kasuko sa suspek gikatahong gigukod ang biktima apan wala makaapas. Human sa ginukdanay ang suspek mipauli sa ilang balay samtang ang biktima didto sa panimalay sa ginganlan og Tereso kinsa nagpaabot sa iyang suweldo sa nagdala kanila sa trabaho nga nailhan lang sa kapolisan sa ngalan nga Rex.

Apan si Roberto kuyog ang amahan niining si Jovencio misulong sa panimalay sa biktima nga armado.

Sa dihang nipauli na ang biktima iyang naabtan ang mga suspek nga miingon " Mario gawas diha kay pabuthon ko ning armas, patyon tika, isog man kaha ka."

Ang asawa sa biktima niadtong tungora mibiya sa ilang balay kay dunay giadto sa Paypay apan sa iyang pagbalik iyang nakit-an iyang bana nga gahay-ad na sa dalan dili layo sa ilang panimalay ug dunay samad pinusilan sa iyang ubol-ubol, tinigbasan sa ulo, aping ug samad sa duha ka kamot.

Si PO1 Rosalie Arnoco nga nahinabi sa Banat News kagahapon miingon nga ang mga imbestigasdor nakakuha og 38 paltik rebolver dunay tulo ka buhing bala diha sulod sa tuong bulsa sa short pants sa biktima.