Trapiko sa Carbon misamot kahuot

Nasinati ang grabeng kahuot sa dagan sa trapiko sa dakbayan sa Sugbu ilabi na gyud sa dalan Manalili lahos na sa M.C. Briones Avenue sa Carbon paingon na sa City Hall human gipatuman sugod kagahapon sa buntag ang rerouting sa maong lugar.

Kini nunot sa pagpasira sa kalsada tupad sa Malacañang sa Sugbu ug kadto lang mga sakyanan gikan sa SRP ang tugotang makalahos og biyahe dinhi sa kinapusoran sa siyudad ug kadtong mga sakyanan gikan sa dakbayan paingon sa SRP adto na moagi sa temporaryong access road kilid sa City Hall Annex building.

Gisugdan mga alas 10:00 sa buntag ang pagsira sa kalsada tupad sa Malacanang sa Sugbu subay usab sa gihatag nga pagtugot sa konseho aron paburan ang hangyo sa Kajima Construction nga padayon karong nag-construct sa gitrabaho nga tunnel lahos sa McArthur Boulevard.

Tungod sa grabeng traffic nga nasinati human sa pagpasira sa maong kalsada daling mipatawag og tigum si Mayor Tomas Osmeña ngadto kang Citom Executive officer Arnel Tancinco ug kang City administrator Francisco Fernandez aron pangitaan og sulbad ang maong problema.

Gibutyag ni Tancinco dihang nahinabi sa mga tigbalita nga nasuko ug gisapot ang mayor sa mitumaw nga problema sa trapiko hinungdan nga gikasabutan nilang suwayan sa pagpatuman ang laing alternatibo karong buntag.

Matud ni Tancinco nga sugod karong buntag limitahan nila ang mga PUJ nga molahos sa Carbon area nga maoy makamugna og grabing suliran sa trapiko.

Usa sa posibling sagupon mao ang dili pagpalahos sa Mandaue nga rota sa MC Briones lahos sa Malacañang sa Sugbu ug adto na lang kini kutob sa may Jereza st. ug kadto lang mga PUJ sa Mabolo, Guadalupe, Banawa ang tugotang makalahos og agi sa maong rota sa F. Gonzales.

Hinuon obserbahan pa sa Citom kun angayan bang palahuson og agi sa Carbon ang mga PUJ gikan sa Lahug nga rota.