Nahitabo kini pasado alas 3 kagahapon sa kaadlawon sa National Highway Balud, Dalaguete, Cebu.
Segun sa report sa kapolisan nga midangat sa Cebu Provincial Police Office usa ka green multicab (GRJ-561) nga gipanag-iya ni Joseph Belgire nga taga Alcoy ug gimaneho ni Edwin Lagahid, 35, residente sa Sitio Labangon, Poblacion sa maong lungsod.
Samtang nagdagan si Lagahid subay sa national road pag-abot sa nahitaboan kalit lang may milabang nga iro apan sa dihang gilikayan kini dungan sa pag-aplay sa preno wala kaayo mosalir tungod sa kadangog sa dalan hinungdan nga didto napunta sa poste sa traffic sign ug milahos sa lubi.
Ang upat ka mga sakay ni Lagahid diha sa luyong bahin pulos nakaangkon og samad, pangos ug bali sa ilang kalawasan dihang nangatagak sa gisakyan nilang multicab gumikan sa kakusog sa impak.
Ang mga biktima naila nga sila si Dino Zozobrado, 23, ulitawo, Edward Yap, 15, ulitawo, pulos residente sa Sitio Cambangyao Poblacion, Adrianne Alcala, 23, ulitawo ug Clib Gingoyon, 20 nga taga Poblacion.
Ang mga biktima daling gihatod sa Cardinal Rosales Memorial Hospital sa Dalaguete apan sila si Lagahid, Zozobrado ug Yap gibalhin sa usa sa mga tambalanan sa dakbayan sa Sugbu gumikan sa mga bali sa kalawasan nga ilang nahiaguman.